ZOMB - një libër i veçantë dhe i denjë për çmim kombëtar
Viti 2009, mund të thuhet se shfaqet i begatë edhe me prurjet në fushën e poezisë, në plan sasie, po nuk mund të thuhet kështu, ndërkaq, në plan të realizimit artistik e estetik. Nga gjithë titujt e këtij viti, libri ZOMB i Ag Apollonit shënon prekje të parametrave kulmore në këtë terren: sa në plan të strukturës tekstore lirike, po aq sa edhe në plan të përmbajtjeve dhe ideve që transmetojnë vargjet. E parë në aspektin e strukturës, kjo përmbledhje paraqet një minibibël poetike, duke nisur përngjashëm me Biblën, me Genesis, dhe duke sosur me Apocalypsis. Liria poetike i ka dhënë dorë autorit për një dozë rebelimi duke thyer konvencën dhe duke e shoqëruar librin me tekstin autorial, si pasthënie me titullin: Filozofia e kreacionit, që i rri shumë pranë esesë së njohur të Edgar Alen Poes – Filozofia e kompozicionit.
Pas leximit të këtij vëllimi poetik na rezulton konkluzioni se autori ka krijuar një materie poetike harmonike ku pajton shkëlqyeshëm cerebralitetin me emocionin, me masë përkatëse të frazës poetike, me ritmin dhe muzikalitetin që mund ta prodhojë fjalësi i koinesë specifike. Gjithsesi një libër i veçantë dhe i denjë për çmim kombëtar në fushën e poezisë.
Prishtinë 3 shkurt 2010
(Arsyetimi i MKRS-së me rastin e ndarjes së çmimit kombëtar për librin më të mirë poetik të vitit 2009)
loading...
Lexo edhe: