Skip to main content

“Jeta e re” - një dashuri dhe shtatë faje


“Jeta e re” - një dashuri dhe shtatë faje

Para gjashtëdhjetë vjetësh Esad Mekuli i dha jetë revistës “Jeta e re”. Ndërsa, pas një pauze nga viti 2006, këtë muaj doli numri jubilar për gjashtëdhjetë vjetorin e kësaj reviste, duke dhënë kështu shenja për riaktivizimin e saj

Ag APOLLONI

“Jeta e re”, revistë me status kulturor - dikur dhe me status letrar - tash, sapo ka dalë nga shtypi. Ky numër jubilar (60-vjetori i revistës) është përgatitur nga Ali D. Jasiqi (kryeredaktor) dhe Halil Haxhosaj e Jonuz Fetahaj (anëtarë redaksie). Iniciativa e tyre për të shënuar përvjetorin e kësaj reviste është për t’u lavdëruar, sepse është udhëhequr nga dashuria (!) përa ta ngjallë revistën, ndërsa mënyra sesi e kanë përgatitur këtë revistë është për t’u qortuar, sepse redaksia ka bërë shtatë faje të pafalshme. Nga një revistë prestigjioze ku, siç thuhet në parathënie, “të gjithë emrat e shquar të letërsisë shqipe në ish-Jugosllavi e ushtruan dhe e zhvilluan talentin e tyre”, “Jeta e re” me rastin e 60-vjetorit të saj është shndërruar në revistë amatore që i bën të turpërohen edhe ata autorë që janë botuar në këtë numër. Ky turp është derivat i shtatë arsyeve (fajeve): 1. edhe pse ky numër pretendon të tregojë fytyrat që e kanë mbajtur gjallë revistën, në të nuk janë botuar tekstet e të gjithë kryeredaktorëve të saj (Rexhep Qosja, Hasan Mekuli dhe Sali Bashota), por vetëm të disave (Esad Mekuli, Rrahman Dedaj dhe Ali D. Jasiqi); 2. nuk janë botuar tekste nga autorë të tjerë përfaqësues të letërsisë së Kosovës, të cilët dihet se kanë kontribuar në këtë revistë (p.sh.: Ramiz Kelmendi, Mehmet Kraja, Ibrahim Rugova, Agim Vinca, Sabri Hamiti, Musa Ramadani, Zejnullah Rrahmani, Eqrem Basha, Ymer Shkreli etj.); 3. janë reduktuar pa ndonjë kriter estetik, pra janë censuruar, tekste që në tërësinë e tyre kanë vlerë, por si fragmente as dreqi s’mund t’u bie në fije; 4. nuk është ndjekur kurrfarë kriteri në radhitje (as mosha, as nacionaliteti, as gjinia letrare, as gjinia seksuale), përndryshe nuk do të kalohej nga Murat Isaku te Roman Jakobsoni; 5. janë botuar 46 autorë meshkuj, por vetëm tri femra, gjë që flet për një revistë “lekëdukagjinçe”; 6. shumica e teksteve janë nga autorë që janë plakur pa krijuar vlerë dhe pa arritur famë, kështu që janë promovuar disa pleq dhe është “masakruar” ndonjë i ri; 7. nuk është prezantuar asnjë shkrimtarë për fëmijë (thuajse ata janë fëmijë dhe si të tillë nuk dinë të shkruajnë!), kur dihet që asokohe në këtë revistë ka qenë një rubrikë e veçantë pë letërsinë për fëmijë.
Qëllimi i daljes së këtij numri të revistës është përkujtimi i saj si revistë letrare më me ndikim në Kosovë; si revistë ku kanë lindur dhe janë zhvilluar shkrimtarët kosovarë; si revistë që krahas qëllimeve letrare ka pasur edhe qëllime kombëtare; si revistë që, pavarësisht presioneve nga pushtuesi serb dhe pavarësisht nga pengesat që vinin nga dashakëqinjtë shqiptarë, vazhdoi të dalë deri në vitin 2006. Qëllimi i daljes është i mirë, por vetë dalja e revistës në këtë gjendje, pa ndjekur kurrfarë kriteri, pos atij familjar, fisnor e klanor, nuk është e mirëseardhur. “Jeta e re” është revista më jetëgjatë e Kosovës, por nëse duhet të aktivizohet, ajo duhet të jetë e gatshme për të hyrë në konkurrencë me revistat tjera shqiptare. Në vitin 1949, “Jeta e re” ishte më e mira sepse nuk kishte tjetër, por për të qenë më e mira në Kosovë edhe sot, ajo nuk duhet të bie viktimë e frymës politike dhe e logjikës provincialiste. Kështu që, edhe sot ajo nuk ka kushedi çfarë konkurrence. Në Kosovë, ajo duhet të konkurrojë vetëm me “Verbin”, pasi që “Kalendari letrar” nuk po jep shenja jete, ndërsa revistat tjera janë ose lokale ose interne të institucioneve përkatëse. Ndryshe nga “Verbi” që është revistë letrare me kritere meskine, “Jeta e re” do të duhej të ndiqte shembullin e revistave letrare e kulturore të Shqipërisë të cilat tash për tash janë më cilësoret dhe, natyrisht, më të lexuarat, ngaqë botojnë tekste të mira, pavarësisht orientimit politik, fetar, gjinor a klanor që mund të ketë akëcili autor. “Jeta e re” dikur ka qenë kulturore, ndërsa tash është vetëm letrare. Arsyet për një rrudhje të tillë mungojnë. Në këtë aspekt, kjo revistë do të mund të mësonte mjaft nga simotrat e saj që botohen në Shqipëri, e veçmas nga revista “Aleph”, e cila në numrin më të ri, përveç shkrimeve letrare, në mes të revistës, me fletë të lëmuara, ka krijuar një ekspozitë arti.

Parathënia e numrit jubilar të revistës “Jeta e re” përfundon me një shpresë “se ky do të jetë fillimi i nisjes së ribotimit të rregull të revistës me traditën më të gjatë të periodikut shqiptar, përkatësisht me gjashtë dekada”. Gjithkush që e ndien vakuumin kulturor që ka shkaktuar “Jeta e re”, e sheh si të domosdoshëm botimin e saj (e jo ribotimin, siç thotë redaksia e saj) edhe në të ardhmen, por mendja e shëndoshë nuk mund të shpresojë në një riaktivizim cilësor të saj, përderisa ajo udhëhiqet nga mendje të vjetëruara.

ag apolloni,shkrime nga Ag Apolloni
loading...

Lexo edhe:

Postimet e fundit






Popular posts from this blog

Trajta e shquar dhe e pashquar e emrit

  Trajta e shquar dhe e pashquar e emrit Trajta themelore e emrit është rasa emërore e pashquar.  Nga trajta themelore ose parësore i fitojmë format e tjera gramatikore të emrit (trajtat). Emrat , si në njëjës ashtu edhe në shumës, përdoren në dy trajta: a) në trajtë të pashquar dhe b) në trajtë të shquar shquar. Emri në trajtën e pashquar tregon qenie, sende ose dukuri në përgjithësi, në mënyrë të papërcaktuar. P.sh.: një nxënës, një punëtor, një mendim , një mace, një laps etj. Emri në trajtën e shquar tregon qenie, sende ose dukuri të tjera, të veçuara nga gjërat e tjera të llojit të vet. P.sh.: nxënësi, punëtori, mendimi, macja, lapsi etj.   Formë përfaqësuese (bazë) e emrit është trajta e pashquar, numri njëjës, rasa emërore : djalë, vajzë, shkollë, lule, letër, njeri, kompjuter, lepur, qen, piano etj. Trajta e shquar e emrit formohet duke i pasvendosur formës përfaqësuese nyjën shquese, përkatësisht mbaresën: a) për emrat e gjin

Ese të ndryshme shqip

Ese dhe Hartime '' Ese dhe hartime të ndryshme shqip dhe anglisht '' Ndalohet rreptësisht kopjimi dhe postimi në një faqe tjetër.  Redaksia Rapitful ka lexuar disa ankesa në emailin e saj të bëra nga disa arsimtarë dhe profesorë ku janë ankuar se nxënësit po i kopjojnë esetë dhe hartimet nga faqja Rapitful dhe me ato ese apo shkrime po prezantohen gjatë shkrimit të eseve dhe hartimeve. Pra redaksia Rapitful kërkon nga nxënësit që të mos kopjojnë esetë dhe hartimet dhe me to të prezantohen para mësimdhënësve por le të jenë këto ese vetëm si një udhërrëfyes se si duhet të shkruhet një ese apo hartim dhe asesi të kopjohen. Ju faleminderit për mirëkuptim. Ese dhe hartime do te shtohen vazhdimisht keshtuqe na vizitoni prap. Nëse dëshironi Analiza letrare të veprave të ndryshme kliko mbi Analiza Letrare Kliko mbi titullin që ju intereson Ese për Diturinë   Për Mjekët! Fakultetet e sotme po kryhen me teste 6 arsye për të mos studiuar mjekësinë P

Tekste shqip: ““Ah Kjo Rruga E Gurbetit” - Shaqir Cërvadiku & Fatjon Dervishi” plus 21 more

Tekste shqip: ““Ah Kjo Rruga E Gurbetit” - Shaqir Cërvadiku & Fatjon Dervishi” plus 21 more “Ah Kjo Rruga E Gurbetit” - Shaqir Cërvadiku & Fatjon Dervishi “Du Me T'pa” - Gjyle Qollaku Nora Istrefi “Kercejna” - Sabiani Feat. Denis Taraj Getoar Selimi “Du Me T'pa” - Lori Bora Zemani “Million” - Melissa
Related Posts Plugin for WordPress, Blogger...

Labels

Show more