Portret
Gjeniu i
palavdishëm
Christof
Waltz është aktor i rrallë, i cili vetëm për rolin e tij në filmin “Inglorious
Basterds” deri tani i ka fituar 27 çmime, duke filluar nga Grand Prix në
Cannes. Ai ishte një aktor i panjohur, i palavdishëm, por tash e tutje do të
jetë shkollë për aktorët e rinj e të vjetër
Viti i
kaluar ishte vit me plot befasi të mira për kinemanë botërore. Viti 2009 do të
mbahet mend për premierën e “Avatar”-it, që theu rekordin e shikueshmërisë; do
të mbahet mend edhe për filmin “The Hurt Locker”, regjisorja e të cilit film u
bë e para femër që merr “Oskar” për regjinë më të mirë. Por, viti 2009 patjetër
se do të mbahet mend edhe për shkak të filmit “Inglorious Basterds”, e sidomos
për paraqitjen maestrale të Christof Waltz në këtë film.
Christof
Waltz (1956) një aktor i lindur në Vjenë të Austrisë e i shkolluar në Seminarin
Max Reinhard në Vjenë dhe në Institutin për teatër “Lee Strasberg” në New York,
deri më tani ishte krejtësisht i panjohur në botën e madhe të filmit, por
bashkëpunimi i tij me regjisorin amerikan Quentin Tarantino e nxori atë nga
anonimiteti ku së pari impresionoi publikun dhe kritikët në Festivalin e
Cannes-it, ku u shpërblye me çmimin “Grand Prix” për interpretimin më të mirë
aktorial. Rruga e tij vazhdon me shumë suksese dhe si rrallë ose si asnjë aktor
tjetër më parë ai vetëm për këtë rol fiton 27 çmime kinematografike, dhe atë që
nga çmimi më i lakmuar për aktorët, ai “Oskar”, e duke vazhduar me “Bafta”,
“Golden Globe”, çmimin e kritikëve të Londrës, të New York-ut, etj. Walz në
këtë film portretizon një kolonel nazist, Hans Landa, një hetues gjenial e i
sofistikuar dhe një poliglot. Ai e portretizon karakterin e Landës me
pedanteri, në mënyrë të detajuar dhe shumë të studiuar. Figura e Landës nuk
është e një nazisti, siç jemi mësuar t’i shohim më parë, të egër e të ftohtë,
por e një njeriu ambicioz që punën e tij e bën me shumë përkushtim e dashuri,
sepse ka qëllim që të ngrihet në pozitë. Prandaj, edhe pse veprimet e Landës
janë veprime që pasohen me humbje të jetëve të njerëzve, Waltz i bën të dukën
më të buta, kushtimisht thënë, më njerëzore. Madje Landa shpesh di të shfaqet
simpatik, e kjo për shkak të aftësisë së tij për të komunikuar më të tjerët,
(ai flet katër gjuhë) për elegancën e veprimeve të tij (edhe atëherë kur
ndëshkon ose ndjek viktimat, këtë e bën me një sharm e mirësjellje të
mahnitshme; ose në rastin kur mbyt aktoren kolaboracioniste të interpretuar nga
Diane Kruger reagimi i tij është shumë i motivuar dhe preciz). Christof Waltz
në film luan rol dytësor, por edhe pse roli i tij është i konceptuar si rol
dytësor, ai me mjeshtrinë e tij prej aktori arrin që të vihet në qendër të
vëmendjes duke i eklipsuar aktorët e tjerë (siç është për shembull Brad Pitt, i
cili do të duhej që të mësonte shumë nga kolegu i tij anonim deri tash, sepse
derisa Waltz anonim shkëlqen, Pitt i famshëm zhgënjen). Por, lirisht mund të
thuhet se edhe vetë filmi “Inglorious basterds” do të mbahet mend pikërisht për
shkak të lojës së bukur të Waltz-it. Madje pak a shumë edhe vetë regjisori
Tarantino e ka pranuar këtë dhe e ka lavdëruar aktorin që është i vetmi që ka
fituar “Oskar” për interpretim në një film të tij, duke u shprehur: “Mendoj se
Landa është një nga personazhet më të mirë, që kam shkruar apo që do të
shkruaj, dhe Christof e ka luajtur ashtu... Është e vërtetë që nëse nuk do ta
kisha gjetur dikë aq të mirë siç është Christof mund të mos e kisha realizuar
“Inglorius Basterds”. Rasti i Waltz dëshmon se të gjithë njerëzit i kanë ato
“pesë minutat” e tyre në jetë, por se duhet pritur ato “pesë minuta” të gatshëm
që kur të vijnë të mos të të gjejnë të papërgatitur dhe të të ikin. Christof
Waltz-it këto minuta i erdhën në moshën pesëdhjetë e tre vjeçare dhe ai i
shfrytëzoi si është më së miri. Ai kishte qenë i gatshëm, duke i pritur qe një
kohë të gjatë. Tani që i zuri dhe është ngjitur në majë, neve na mbetët të
presim se çfarë do të jetë mrekullia e radhës që ai do na servojë në pëlhurën e
bardhë të kinemasë. (B. Apolloni)
Shkrim nga Ben Apolloni
Ben Apolloni shkrime nga ben apolloni,aktoret e hollivudit,shkrime Ben Apolloni
loading...
Lexo edhe:
